Իսպանիայում հանդիպումը դադարեցվել է երկրպագուի մահվան պատճառով

Իսպանիայի երկրորդ դիվիզիոնի 13-րդ տուրի «Սեուտա» և «Ալմերիա» ակումբների միջև հանդիպումը դադարեցվել է մարզադաշտի տրիբունաներում տեղի ունեցած դեպքի պատճառով։ Այս մասին հայտնում է լիգայի մամուլի ծառայությունը։

AS պարբերականի տեղեկություններով՝ հանդիպումը դադարեցվել է 18-րդ րոպեին, երբ տրիբունաներում գտնվող 73-ամյա Մանոլո Կառետոյի ինքնազգացողությունը վատացել է։ Բժիշկները մոտ 10 րոպե տևողությամբ բուժօգնություն են ցուցաբերել, սակայն հիվանդանոց տեղափոխվելու ճանապարհին նա մահացել է։

Լիգայի պաշտոնական հայտարարության մեջ նշվում է. «Լիգան ցավակցություն է հայտնում «Սեուտայի» երկրպագուի ընտանիքին, մերձավորներին և բոլոր անձանց։ Հանդիպումը հետաձգվում է։ Նոր ամսաթիվը կհայտարարվի առաջիկայում»։

«Սեուտա» և «Ալմերիա» ակումբները ընդմիջմանը նախնական պայմանավորվածություն են ձեռք բերել խաղը մեկ այլ օր ավարտելու վերաբերյալ։ Այնուամենայնիվ, հանդիպման վերսկսման վերջնական որոշումը մնում է լիգային։