Մտածեցի՝ այլևս չի փրկվի, երեխային դեռ չեմ տեսել․ թիթեղի հարվածից վնասվածք ստացած հղի կին

«Մեր հարևանը շատ կարճ ժամանակահատվածում ինձ տեղափոխեց հիվանդանոց,  բժկուհիներ Նառա Սուրենովնան և Անահիտ Հովիկովնան շատ արագ կազմակերպեցին կեսարյան հատում, որի արդյունքում ծնվեց բալիկս։ Երեխան հիմա, փառք Աստծո, ողջ  է։ Հա՛մ բալիկի մոտ, հա՛մ ինձ մոտ դրական փոփոխություններ կան՝ շնորհիվ պրոֆեսիոնալ բժիշկների և հիվանդանոցի ղեկավարության, որոնք մեզ յուրահատուկ ձևով են վերաբերվում»,-նշեց ծննդկանը։

Ռուզաննան պատմեց, որ վնասվել է իրենց տան կտուրի թիթեղից. «Բավականին մեծ կտոր էր, պոկվեց և հարվածեց ինձ։ Մտածում էի՝ բալիկս չի փրկվի, բայց Աստծո ու հրաշք բժիշկների շնորհիվ ամեն ինչ լավ է»։

Ծնողները որոշել են փոքրիկին Մարինե անվանակոչել։ Նա ընտանիքի երրորդ բալիկն է։

«Երեխային  միայն նկարներով եմ տեսել։ Գիտեմ, որ վիճակը կայուն է։ Այո՛, իմ բալիկն ինձ փրկել է, բացի այդ, եթե չլինեին բժշկական պրոֆեսիոնալ  անձնակազմն ու Աստված, ես չէի փրկվի»։

Նշենք, որ  կեսարյան հատման արդյունքում ծնվել է 2450 գրամ քաշով 48 սմ հասակով աղջիկ` ճակատի ձախ շրջանում 5սմ երկարությամբ խորը վնասվածքով:

Վերքը կարելու նպատակով նորածինն անմիջապես տեղափոխվել էր «Սուրբ Աստվածամայր» բժշկական կենտրոն: Մասնագետները համոզված են, որ կնոջ կյանքը փրկել է հղիությունը` դեռևս չծնված երեխան:

«Էրեբունի» ծննդատան տնօրեն, բ.գ.թ, դոցենտ Անդրանիկ Պողոսյանը լրագրողների հետ զրույցում հայտնեց՝ իր 45-ամյա  պրակտիկայում նման դեպք չէր տեսել. «Կարծեք բարձրյալի հրաշքը լինի, որ կինն ու նորածինը փրկվել են»։

Նրա խոսքով, դեպքից անմիջապես հիվանդանոց տեղափոխված կինը հետազոտվել է, 2-3 րոպե անց նախապատրաստել են վիրահատության. «Վիրահատության կտրվածքը շատ ճիշտ է կատարվել, քանի որ հիմնական խնդիրը եղել է հենց արգանդի վնասվածքը։ Կինը նշել է, որ վնասվածքից հետո ջրերը գնացել են։ Հարվածն այնքան ուժեղ է եղել, որ նորածնի ձախ քունքի վերևի շրջանում բավականին խոր պատռվածք կա։ Մայրն էլ դեպի լավին է գնում, շուտով կպատրաստենք դուրս գրման»,-ասաց Պողոսյանը։

Հիշեցնենք, որ մայիսի 11-ին, երեկոյան ժամը 17:10-ին «Էրեբունի» ծննդատուն է տեղափոխվել 23-ամյա 36 շաբաթական հղի` որովայնի թափանցող վնասվածք-պատռվածքով, սուր ցավերով, արյունահոսությամբ:

Նախնական տեղեկություններով` կիրակի երեկոյան, ուժգին քամու ժամանակ, տանիքից պոկվել է թիթեղի մի կտոր և հարվածել այդ պահին բակում գտնվող հղի կնոջը` վնասելով որովայնը: Հարազատները կնոջն անմիջապես ծննդատուն են տեղափոխել: Հղիին հետազոտելուց հետո, բժշկական կենտրոն մտնելուց ընդամենը 7 րոպե անց սկսվել է վիրահատությունը: Կատարվել է կեսարյան հատում, վերականգնվել է պատռված արգանդը: Ծնվել է 2450 գրամ քաշով 48 սմ հասակով աղջիկ` ճակատի ձախ շրջանում 5սմ երկարությամբ խորը վնասվածքով:

Վերքը կարելու նպատակով նորածինն անմիջապես տեղափոխվել է «Սուրբ Աստվածամայր» բժշկական կենտրոն: Մոր և երեխայի վիճակը բժիշկները գնահատում են բավարար: