Հայաստանի տարածքով ռազմական ճանապարհով միջանցքի բացումը անկանխատեսելի հետևանքներ կարող է ունենալ Բաքվի համար. փորձագետ

Ադրբեջանի նախագահ Ալիևի դիրքորոշումը Հայաստանի տարածքով միջանցքի հարցում հասարակական հարթությունում մնում է նույնը, սակայն նա հասկանում է, որ աշխարհաքաղաքական անկայունության ֆոնին ռազմական ճանապարհով միջանցք բացելու փորձը կարող է անկանխատեսելի հետևանքներ ունենալ։ Դրա մասին NEWS.am-ի «Ուժի գործոն» հաղորդման ժամանակ հայտարարել է թուրքագետ Վահրամ Տեր-Մաթևոսյանը։

Նրա համոզմամբ՝ նման քայլը կարող է մի շարք նոր խնդիրներ ստեղծել Բաքվի համար, այդ թվում՝ այն առումով, թե ինչպես այն կներկայացվի Իրանին, Ռուսաստանին, ԱՄՆ-ին և Եվրոպային։ «Ադրբեջանը հարցերի պատասխաններ չունի։ Քանի դեռ այդպես է, Ադրբեջանից ռազմական ագրեսիա սպասելն անիրատեսական է»,- ընդգծել է Տեր-Մաթևոսյանը։

Ընդ որում նա չի բացառել, որ կարող են կտրուկ փոփոխություններ տեղի ունենալ։ Ըստ նրա՝ շատ բան կախված է Հայաստանից, թե ինչպես կաշխատի Եվրոպայի, ԱՄՆ-ի և Ռուսաստանի հետ։ «Հայաստանի դիվանագիտությունը ցույց չի տալիս այն ագրեսիվ աշխատանքը, որը պետք է կատարեր օկուպացված 208 քառակուսի կիլոմետր տարածք ունեցող երկիրը»,- նշել է փորձագետը։

Թուրքագետը համոզմունք է հայտնել, որ Բաքվի արձագանքը կախված է Երևանի քայլերից։ Նա նշել է, որ Հայաստանը պետք է Սյունիքը վերածի ռազմավարական նշանակության տարածքի, բազմաթիվ ծրագրեր իրականացնի, այնտեղ զորավարժություններ անցկացնի Ռուսաստանի և Իրանի հետ՝ ազդանշան տալով Թուրքիային և Ադրբեջանին, որ Բաքվին պարզապես թույլ չի տա իրականացնել իր մտադրությունները։ «Երևանի և Մոսկվայի միջև շփումները հասցվել են նվազագույնի, ինչը անհանգստություն է առաջացնում։ «Մենք պետք է աշխատենք Ռուսաստանի հետ, որպեսզի կարողանանք անվտանգության ոլորտում հրատապ հարցեր քննարկել»,- եզրափակել է Վահրամ Տեր-Մաթևոսյանը։