Վրաստանի ԿԸՀ-ն ավարտել է խորհրդարանական ընտրություններին մասնակցող կուսակցությունների գրանցումը

Հոկտեմբերի 26-ին Վրաստանի խորհրդարանական ընտրություններին մասնակցելու համար քաղաքական կուսակցությունների գրանցման գործընթացն ավարտվել է, հայտնում է Վրաստանի Կենտրոնական ընտրական հանձնաժողովը։ Գրում է news.am-ը։

Կենտրոնական ընտրական հանձնաժողովում (ԿԸՀ) գրանցվել է 27 կուսակցություն։

«Քաղաքական կուսակցությունների համար հաջորդ փուլը ենթադրում է կուսակցությունների ցուցակների ներկայացում, որոնց ներկայացման վերջնաժամկետը սեպտեմբերի 26-ն է։ Օրենսդրության համաձայն, ընտրվող սուբյեկտը կուսակցական ցուցակը պետք է ներկայացնի Կենտրոնական ընտրական հանձնաժողովի նախագահին՝ ընտրությունների օրվանից առաջ ոչ ուշ, քան 30-րդ օրը։ Յուրաքանչյուր կուսակցություն իրավունք ունի ներկայացնելու միայն մեկ կուսակցության ցուցակ։ Կուսակցական ցուցակում պատգամավորության թեկնածուների թիվը չպետք է լինի 30-ից պակաս և 200-ից ավելի: Նույն անձը չի կարող ընդգրկվել կուսակցական տարբեր ցուցակներում: Կուսակցությունների ցուցակները ներկայացնելուց հետո կսկսվի ներկայացված փաստաթղթերի ճշտման գործընթացը, ապա գրանցման գործընթացը»,- ասված է ԿԸՀ-ի տեղեկատվության մեջ։