Եվրախորհրդարանի պատվիրակության աշխատանքը Թուրքիայում փորձել են խոչընդոտել

Եվրախորհրդարանի պատգամավորներից և եվրոպացի ակադեմիկոսներից բաղկացած 13 հոգանոց խումբը, ժամանելով Թուրքիա, տարատեսակ խոչընդոտների է հանդիպել այնտեղ անցկացվող ուսումնասիրությունների ընթացքում: Այս մասին հայտնում է թուրքական demokrathaber.org կայքը:

Խումբն ուսումնասիրություններ է անցկացնում Թուրքիայի Ստամբուլ և Դիարբեքիր քաղաքներում, որի արդյունքում կազմված զեկույցը կներկայացվի Եվրախորհրդարանին և ՄԱԿ-ի ղեկավարությանը:

Պատվիրակությունն ավելի վաղ դիմել էր Թուրքիայի արդարադատության նախարարությանը` «Քուրդիստանի աշխատավորական կուսակցություն» խմբավորման հիմնադիր, քրդական շարժման առաջնորդ Աբդուլլահ Օջալանի հետ հանդիպելու համար, որը ցմահ ազատազրկման մեջ է գտնվում թուրքական Իմրալը կղզու բանտում: Մինչդեռ նրանց այս խնդրանքը մերժվել է, ընդ որում՝ ներքին կարգով, առանց պաշտոնական հայտարարության: Այս մասին լրատվամիջոցներին հայտնել է պատվիրակության անդամ, Քեմբրիջի համալսարանի պրոֆեսորներից Թոմաս Միլեյը:

Թուրք ոստիկանները նաև խոչընդոտել են պատվիրակության անդամներին, երբ վերջիններս փորձել են քրդամետ Դեմոկրատական շրջանների կուսակցության շենքի դիմաց մամուլի ասուլիս անցկացնել:

Թոմաս Միլեյը հավելել է, որ թուրք-քրդական բախումների հետևանքով քրդաբնակ շրջաններում փողոց դուրս գալու արգելքների սահմանումն ու դրանց ընթացքում իրականացվող գործողություններն ուղեկցվում են մարդու իրավունքների կոպիտ խախտումներով:

tert.am