ՀԱՕԿ-ն Արթուր Ալեքսանյանի եզրափակիչ գոտեմարտի հետ կապված բողոք է ներկայացրել Միջազգային օլիմպիական կոմիտեի բողոքարկման հանձնաժողովին

Հայաստանի ազգային օլիմպիական կոմիտեն Օլիմպիական խաղերում ըմբիշ Արթուր Ալեքսանյանի եզրափակիչ գոտեմարտի հետ կապված բողոքով դիմել է Միջազգային օլիմպիական կոմիտեի բողոքարկման հանձնաժողովին: «Արմենպրես»-ի թղթակցի հաղորդմամբ`այս մասին լրագրողների հետ զրույցում ասաց ՀՀ ԿԳՄՍ նախարարի տեղակալ Կարեն Գիլոյանը:

«Օլիմպիական խաղերում ըմբշամարտի 97 կգ քաշային կարգի եզրափակչում Արթուր Ալեքսանյանի և իրանցի Մոհամադհադի Սարավիի գոտեմարտի բողոքարկման գործընթացը հետևյալ փուլում է. Ըմբշամարտի միջազգային ֆեդերացիան գրավոր պատասխանել է, որ մրցավարները ճիշտ որոշում են կայացրել:

Այն, որ մենք 100 տոկոսով ճիշտ ենք, դա փաստ է: Հայաստանի ազգային օլիմպիական կոմիտեն, կցելով Հայաստանի ըմբշամարտի ֆեդերացիայի բողոքարկումը և Ըմբշամարտի միջազգային ֆեդերացիայի պատասխանը, դիմել է միջազգային օլիմպիական կոմիտեի բողոքարկման հանձնաժողովին»,-ասաց Գիլոյանը:

Վերջինիս խոսքով` օլիմպիական կոմիտեի բողոքարկման հանձնաժողովն առաջին արձագանքով խնդրել է նաև կոնկրետ ներկայացնել`որ դրվագում և ինչի դեմ է բողոքը:«Մենք Օլիմպիական խաղերի ընթացքում ունեցանք դեպքեր, երբ այլ գոտեմարտում նմանատիպ դրվագի համար ճիշտ հակառակ վերաբերմունքն է եղել:

Մենք առավել քան վստահ ենք, որ Արթուր Ալեքսանյանն այդ գոտեմարտը չէր պարտվի: Թող բողոքարկման հանձնաժողովը որոշի: Մենք մեր ոսկե մեդալը պահանջելու ենք մինչև վերջ, մինչև վերջին ատյան, մինչև Լոզան»,-ասաց նա: