Հայաստանում 6 ամսում 248 անչափահաս է ձերբակալվել. շեշտակի աճել է 14-15 տարեկան իրավախախտների թիվը

Հայաստանում նախորդ տարի շեշտակի աճել է անչափահաս` 14-15 տարեկան իրավախախտների թիվը: Այս մասին NEWS.am-ը տեղեկանում է՝ ամփոփելով վիճակագրական կոմիտեի հրապարակած՝ Հայաստանում գրանցված հանցագործությունների վերաբերյալ պաշտոնական վերջին տվյալները:

Մասնավորապես՝ պաշտոնական տվյալներով 2023թ. հանցագործության կատարման համար հայտնաբերվել է 11 796 անձ, որոնց գերակշիռ մասը (9303) 18-50 տարեկան են, 2 220-ը 50 և բաձր տարիքի: Նախորդ տարի հայտնաբերված հանցագործություն կատարած անձանցից 63-ը՝ 14-15 տարեկան անչափահասներ են, ինչը գրեթե կրկանակի ավելի է 2022թ. ցուցանիշից (34 անձ):

Համաձայն պաշտոնական տվյալների՝ 2023թ. երկրորդ կիսամյակում Հայաստանում ձերբակալվել է 248 անչափահաս, որից 158-ն քննիչի որոշմամբ ազատ են արձակվել: Ազատ արձակված անչափահասներից 151-ի դեպքում վերացել է անձին անազատության մեջ պահելու անհրաժեշտությունը, 3-ի դեպքում լրացել է ձերբակալման օրենսգրքով սահմանված առավելագույն ժամկետը, իսկ 4-ի դեպքում չի հաստատվել անձի կողմից քրեական օրենքով նախատեսված արարք կատարելու վերաբերյալ կասկածը:

Փոխարենը նախորդ տարի նվազել է հանցագործություն կատարած կանանց թվաքանակը: Մասնավորապես 2023թ. հայտնաբերված կին հանցագործների թիվը եղել է 1 116, ինչը 91-ով պակաս է 2022թ. ցուցանիշից:

Նախորդ տարի շեշտակի աճել է նաև հանցագործության կատարման համար պատասխանատվության ենթարկված անձանց թիվը: Եթե 2022թ. պատասխանատվության է ենթարկվել 4 895, ապա 2023-ին 7 318 քաղաքացի:

Այս ցուցանիշներն ուսումնասիրելիս պարզ է դառնում, որ Հայաստանում նախորդ տարի գրեթե երեք անգամ աճել է հարբած վիճակում կատարված հանցագործությունների թիվը: Մասնավորապես պատասխանատվության ենթարկված անձանցից 1 530-ը եղել են հարբած վիճակում, իսկ 15-ը՝ թմրանյութի ազդեցության տակ:

Համեմատության համար նշենք, որ 2022-ին պատասխանատվության ենթարկված քաղաքացիներից 605-ը հանցագործությունը կատարել են հարբած վիճակում, իսկ 5-ը եղել են թմրանյութի ազդեցության տակ:

Թեև պաշտոնական տվյալներում արտացոլված չեն հանցագործության կոնկրետ տեսակները, որոնք կատարվել են ոչ սթափ վիճակում, սակայն ըստ ամենայնի՝ գրանցված հանցագործությունների մեծ մասն առնչվում է ճանապարհային երթևեկության անվտանգության և տրանսպորտային միջոցների շահագործման կանոնների խախտման դեպքերին:

Նշենք, որ ըստ վիճակագրական կոմիտեի տվյալների՝ 2023-ին գրանցվել է ճանապարհային երթևեկության և տրանսպորտային միջոցների շահագործման կանոնները խախտելու 2 185 դեպք, որից միայն 873-ը Երևանում: