Թոմաս Տուխելը կոտրվածք է ստացել հանդերձարանում մոտիվացնող խոսքի ժամանակ

Գերմանիայի չեմպիոն Մյունխենի «Բավարիայի» գերմանացի գլխավոր մարզիչ Թոմաս Տուխելը Իտալիայի փոխչեմպիոն Հռոմի «Լացիոյի» դեմ Չեմպիոնների լիգայի 1/8 եզրափակիչի պատասխան հանդիպումից առաջ հանդերձարանում ոտքի բթամատի կոտրվածք է ստացել, հաղորդում է Bild-ը։

«Խաղից առաջ մոտիվացնող ճառս ոտքիս բթամատի գին ունեցավ։ Ինձ անմիջապես օգնություն ցուցաբերեցին, բայց ես համարձակություն չունեցա հանել մարզակոշիկս, քանի որ վստահ չէի, որ կկարողանամ դարձյալ հագնել։ Ես ինչ-որ բանի էի հարվածել ոտքով։

Ֆուտբոլիստները հավանաբար զարմացած էին, որ 90 րոպե նստած մնացի։ Նրանք չգիտեին, որ այդպիսի խնդիր ունեմ»,- պատմել է Տուխելը հանդիպումից հետո։

«Բավարիան» «Լացիոյին» հաղթել էր 3:0 հաշվով եւ դուրս եկել քառորդ եզրափակիչ։ Հռոմում մյունխենյան թիմը պարտվել էր 0:1 հաշվով։