Ադրբեջանցի փաստաբանն ինքնահրկիզվել է Նոր տարվա առաջին օրը

Փաստաբան Զաուր Մամեդովն ինքնահրկիզվել է Բաքվում Փաստաբանների միության շենքի դիմաց` հունվարի մեկին:

Փաստաբանների միության նախագահ Անար Բաղիրովը զարմանք է հայտնել կատարվածի առնչությամբ՝ ընդգծելով, որ Մամեդովը փաստաբանների միության հետ խնդիրներ չի ունեցել, նրա նկատմամբ կարգապահական վարույթներ հարուցված չեն եղել։

Բաղիրովը հայտնել է, որ, դեպքի մասին տեղեկանալով, անմիջապես կապվել է Սալյանի շրջանի փաստաբանական գրասենյակի ղեկավարի հետ, որտեղ աշխատել է Մամեդովը։Գրասենյակի ղեկավարն ասել է, որ վերջին շրջանում «մթնոլորտը լարված է» եղել, սակայն փաստաբանների միության և Մամեդովի միջև նկատելի խնդիրներ չեն եղել։

Բաղիրովը ցավակցություն է հայտնել հանգուցյալի ընտանիքին՝ Մամեդովի ողբերգական մահվան կապակցությամբ։ Նա խոստացել է լիակատար համագործակցություն ընթացող հետաքննության հետ` վստահեցնելով, որ այս դժբախտ դեպքի ցանկացած հնարավոր դրդապատճառ կբացահայտվի նախաքննության ընթացքում։

Հաղորդվում է, որ Մամեդովը դյուրավառ նյութ է լցրել իր վրա և ինքնահրկիզվել Փաստաբանների միության գրասենյակի դիմաց։ Փաստաբանը ստացած այրվածքներից տեղում մահացել է ։

Նարիմանովսկի շրջանի դատախազությունը դեպքի առթիվ հետաքննություն է սկսել: