Դեկտեմբերի 21-ը ՄԱԿ-ը հռչակել է Բասկետբոլի համաշխարհային օր. Նյու Յորքի համալսարանում սովորող հայ երիտասարդի ներդրումը այդ գործում

Օգոստոսի 25-ին, ՄԱԿ-ը ընդունել է բանաձև որով դեկտեմբերի 21-ը հայտարարվել է Բասկետբոլի համաշխարհային օր: Նախաձեռնությունը ՄԱԿ-ին ներկայացրել է Ֆիլիպինները, սակայն գաղափարի հեղինակը Նյու Յորքի համալսարանի պրոֆեսոր Դավիդ Հոլլանդերն է:

Դավիդ Հոլլանդերի ուսանողներից մեկը Նյու Յորքի համալսարանի սպորտ մենեջմենք բաժնում սովորող Տիգրան Տեր-Մաթևոսյանն է, որը Tert.am-ի հետ զրույցում պատմել է նախաձեռնության մասին:

«Պրոֆեսոր Դեյվիդ Հոլանդերը ուներ մի դասընթաց, որի անունն էր «Ինչպես բասկետբոլը կարող է փոխել աշխարհը», ու այս դասընթացի վերջնական նպատակը այն էր, որ մենք գրեինք նամակներ, որոնք պետք է միավորվեին ու ստացվեր մեկ ընդհանուր նամակ, որը պետք է ուղարկվեր ՄԱԿ

Մենք դասընթացի մասնակիցներով ունեցել ենք մեր ներդրումը, որ օգոստոսի 25-ին, ՄԱԿ-ը ընդունեց բանաձև, որով դեկտեմբերի 21-ը հայտարարվեց Բասկետբոլի համաշխարհային օր»,- ասել է նա:

Տիգրանը մեզ հետ զրույցում ասաց, որ այս տարի լույս է տեսել պրոֆեսոր Հոլլանդերի «Ինչպես բասկետբոլը կարող է փրկել աշխարհը» բեսթսելլերը: Եվ հիմա իրենք աշխատանքներ ենք տանում, որպեսզի գիրքը թարգմանվի և հայկական հրատարակչություններում տպագրվի:

«Գիրքը ներկայացված է բասկետբոլի 12-13 կանոնների տեսքով, թե ինչ նշանակություն ունի բասկետբոլը հասարակության համար:

Այդ կանոններից է օրինակ, որ բասկետբոլի միջոցով մարդիկ կարող են համագործակցել, կամ, որ բասկետբոլը չունի բաժանումներ խաղացողների համար, և բասկետբոլում ամեն մեկը կարող է ունենալ կաևոր ներդրում, և դա կապում ենք նրա հետ, որ կյանքում է պետք է այդպես լինի, որ մարդիկ չունենան բաժանումներ, և, որ բոլորը կարող են կարևոր բանի հասնել իրենց կյանքում: Կանոններից է նաև, որ բասկետբոլը բոլորի համար է, և չկան մարդկանց տեսակներ, որ չեն կարող խաղալ բասկետբոլ»,- ասել է նա:

Տիգրան Տեր-Մաթևոսյանի խոսքով գովելի է այն, որ վերջին շրջանում հայկական բասկետբոլում մենք ունենք հաջողություններ:

«Շատ կարևոր է նաև նշել այն, որ Հայաստանում կանանց բասկետբոլն էլ է զարգանում և հաջողություններ գրանցում»,- ասել է նա: