Գվարդիոլա․ Հրաշալի հանդիպում անցկացրինք

Անգլիայի չեմպիոն «Մանչեսթեր Սիթիի» կատալոնացի գլխավոր մարզիչ Խոսեպ Գվարդիոլան մեկնաբանել է 3:0 հաշվով հաղթանակը Լիվերպուլի «Էվերտոնի» նկատմամբ Պրեմիեր լիգայի 35-րդ տուրի արտագնա խաղում։

«Չեմպիոնների լիգայի կիսաեզրափակիչի երկու հանդիպումների միջեւ անցկացրինք բարդ հանդիպում «Էվերտոնի» հետ։ Այս թիմը մեկ շաբաթ առաջ հինգ գոլ է խփել «Բրայթոնին», բայց մենք կարողացանք առաջին րոպեից վերահսկողության տակ վերցնել խաղը եւ հրաշալի հանդիպում անցկացնել։

Մրցակիցը խորքից էր պաշտպանվում ամբողջ հանդիպման ընթացքում, բայց դա չէր խանգարում մեզ ազատ գոտիներում գրոհել։ Ամեն հաղթանակը մեզ ուժ է տալիս հաջորդ խաղի համար։

Առջեւում «Ռեալի» հետ պատասխան հանդիպումն է։ Ես ֆուտբոլիստներին հորդորել եմ հանգստանալ, թուլանալ եւ անել այն, ինչ անում են արդեն մի քանի մրցաշրջան»,- Գվարդիոլայի խոսքը մեջբերում է BBC-ն։

Չեմպիոնների լիգայի կիսաեզրափակիչի «Մանչեսթեր Սիթի» - «Ռեալ» պատասխան հանդիպումը տեղի կունենա մայիսի 17-ին։ Մադրիդում տեղի ունեցած առաջին խաղում գրանցվել էր ոչ ոքի՝ 1:1: