Ջերմուկ․ Սամուել Սեւյանը երկրորդ հաղթանակը տարավ եւ միանձնյա առաջատարն է

Ջերմուկում տեղի ունեցավ Ստեփան Ավագյանի հուշամրցաշարի երկրորդ տուրը։ Ամերիկահայ գրոսմայստեր Սամուել Սեւյանը հաղթեց ռուսաստանցի Անդրեյ Եսիպենկոյին եւ 2 միավորով միանձնյա գլխավորում է մրցաշարային աղյուսակը։

Հայաստանի ներկայացուցիչ Ռոբերտ Հովհաննիսյանը պարտության մատնեց գերմանացի Ֆրեդերիկ Սվանեին եւ 1,5 միավորով երկրորդն է։ Նույնքան միավոր ունի հնդիկ Նարայանան, որը երկրորդ տուրում ոչ ոքի խաղաց իրանցի Տաբատաբաեի հետ։

Հայկ Մ․ Մարտիրոսյանը (Հայաստան) ոչ ոքի խաղաց Չեխիայի ներկայացուցիչ Նգույենի հետ եւ վաստակել է մեկ միավոր։ Արթուր Դավթյանը միավորը կիսեց ուզբեկ Նոդիրբեկ Յակուբոեւի հետ եւ ունի կես միավոր։

Մրցաշարում կանցկացվի 9 մրցափուլ։ Մրցանակային հիմնադրամը 4 միլիոն դրամ է: Մրցաշարի գլխավոր հովանավորն է Ստեփան Ավագյանի ընտանիքը: