Ծեծկռտուք՝ խորհրդարանում․ վրացիները վրդովված են (տեսանյութ)

Վրաստանի խորհրդարանի իրավական հարցերով հանձնաժողովի այսօրվա նիստի ժամանակ ծեծկռտուք է տեղի ունեցել պատգամավորների միջեւ։

«Օտարերկրյա գործակալների մասին» օրենքի քննարկման ժամանակ կոնֆլիկտ է սկսվել իշխող «Վրացական երազանք» կուսակցության պատգամավոր Անրի Օխանաշվիլիի և ընդդիմության պատգամավորների միջև։ Ծեծկռտուքից հետո դահլիճից հեռացվել են ընդդիմադիր «Աղմաշենեբելիի ռազմավարություն» կուսակցության առաջնորդ Գիորգի Վաշաձեն և «Միացյալ ազգային շարժում» կուսակցության նախագահ Լևան Խաբեիշվիլին։

Հանձնաժողովի նիստին զուգահեռ խորհրդարանի շենքի մոտ բողոքի ակցիա է ընթանում։ Քաղաքացիական հասարակության ներկայացուցիչներն ու լրագրողները, ինչպես նաև հրապարակում հավաքված քաղաքացիները բողոքում են «օտարերկրյա գործակալների մասին» օրինագծի դեմ։ 

Հիշեցնենք, որ ակցիայի կապակցությամբ խորհրդարանի շենքի շրջակայքում և ներսում ուժեղացվել են անվտանգության միջոցառումները, ներգրավվել են մեծ թվով ոստիկաններ։
Նշենք, որ «Օտարերկրյա ազդեցության թափանցիկության մասին» օրենքի համաձայն, որը Վրաստանի խորհրդարան է ներկայացրել փետրվարի 14-ին «Ժողովրդական ուժ» շարժումը, Վրաստանի ընկերությունները, որոնք իրենց տարեկան եկամտի 20 տոկոսից ավելին ստանում են օտարերկրյա պետություններից, միջազգային կազմակերպություններից, հաստատություններից և անձանցից, ինչպես նաև Վրաստանի քաղաքացի չհանդիսացող անձինք, ԶԼՄ-ները և պետության կողմից չստեղծված հասարակական կազմակերպությունները, ամեն հունվարին Վրաստանում պետք է գրանցվեն որպես «օտարերկրյա ազդեցության գործակալներ»։ 

Նրանք, ովքեր չեն գրանցվել, կտուգանվեն 25,000 լարի (9,500 ԱՄՆ դոլար) չափով: Անկախ փորձագետները պնդում են, որ ընդունվելու դեպքում օրենքը կսահմանափակի Վրաստանում խոսքի և մամուլի ազատությունը և կխոչընդոտի երկրի եվրաատլանտյան ինտեգրմանը: ԱՄՆ-ն, Եվրամիությունը, ՄԱԿ-ը և Վրաստանի մի շարք միջազգային գործընկերներ քննադատել են օրինագիծը։