Չավի․ 2 պարտությունից հետո որոշակի վատատեսություն կա

Իսպանիայի փոխչեմպիոն «Բարսելոնայի» իսպանացի գլխավոր մարզիչ Չավին պատմել է թիմի վիճակի մասին Մադրիդի «Ռեալի» դեմ Իսպանիայի գավաթի խաղարկության կիսաեզրափակիչի առաջին հանդիպումից առաջ։

«Բարսելոնան» նախորդ երկու հանդիպումներում պարտություն է կրել։ Եվրոպայի լիգայի փլեյ-օֆֆի պատասխան խաղում կատալոնական թիմը Անգլիայում 1:2 հաշվով պարտվել էր «Մանչեսթեր Յունայթեդին» եւ դուրս մնացել պայքարից։ Իսպանիայի առաջնությունում «Բարսելոնան» 0:1 պարտվել էր «Ալմերիային»։

«Այո, երկու պարտությունից հետո որոշակի վատատեսություն կա, բայց այդ ամենը չի ազդում մեր թիմի վրա։ Ես դժվարությունները համարում եմ նոր հնարավորություն։

Մենք կարող ենք հաղթել առաջնությունում էլ, գավաթի խաղարկությունում էլ։ Ֆուտբոլիստների տրամադրվածության հետ ամեն ինչ կարգին է»,- Չավիի խոսքը մեջբերում է Mundo Deportivo-ն։

Իսպանիայի գավաթի խաղարկության կիսաեզրափակիչի «Ռեալ» - «Բարսելոնա» առաջին հանդիպումը տեղի կունենա մարտի 2-ին։