Սոֆիա. Դավիթ Չալոյանն ապահովեց Հայաստանի երկրորդ մեդալը

Հայաստանի թիմը երկրորդ մեդալն ապահովեց Բուլղարիայի մայրաքաղաք Սոֆիայում ընթացող բռնցքամարտի Ստրանջայի միջազգային մրցաշարում: +92 կգ քաշայինների 1/8 երզափակիչում աշխարհի փոխչեմպիոն Դավիթ Չալոյանը տպավորիչ հաղթանակ տարավ Գերմանիայի ներկայացուցիչ Նիկիտա Պուտիլովի նկատմամբ:

2021 թվականի աշխարհի փոխչեմպիոնը ոչ մի հնարավորություն չտվեց գերմանացի մրցակցին: Մրցավարները բոլոր ռաունդներում հաղթանակը տվեցին հայ բռնցքամարտիկին:

Ավելի վաղ Հայաստանի համար առանց պայքարի բրոնզե մեդալ էր ապահովել նաեւ Գուրգեն Մադոյանը, որի մրցակիցը վնասվածքի պատճառով հրաժարվել էր մենամարտից:

Դավիթ Չալոյանի եւ Գուրգեն Մադոյանի մասնակցությամբ կիսաերզափակիչները տեղի կունենան փետրվարի 25-ին:

4-րդ մրցումային օրը Կարեն Աղամալյանի գլխավորած թիմից հաղթանակներ տարան Եվրոպայի փոխչեմպիոն Արթուր Բազեյանը (57), Ռուդոլֆ Գարբոյանը (51 կգ) եւ Համբարձում Հակոբյանը (80 կգ):

Բարեղամ Հարությունյանը (48 կգ) եւ Արթուր Ղազարյանը (60կգ) պարտվեցին քառորդ եզրափակիչում: