Անչելոտի․ Մեծ վստահությամբ ենք մոտենում «Լիվերպուլի» դեմ խաղին

Մադրիդի «Ռեալի» իտալացի գլխավոր մարզիչ Կառլո Անչելոտին մեկնաբանել է 2:0 հաշվով հաղթանակն «Օսասունայի» նկատմամբ Իսպանիայի առաջնության 22-րդ տուրի խաղում։ Արքայական թիմը պատրաստվում է Անգլիայի փոխչեմպիոն «Լիվերպուլի» դեմ առաջին հանդիպմանը Չեմպիոնների լիգայի 1/8 եզրափակիչում։

«Այն, ինչ արեցինք երկրորդ խաղակեսում, կարող էինք անել նաեւ առաջին խաղակեսում։ Բայց ես շատ հավանեցի թիմի միասնականությունը։ Կարեւոր էր այս հաղթանակը, որպեսզի դուրս չմնայինք չեմպիոնական մրցավազքից։

Կազմի հետ ամեն ինչ կարգին է։ Կրոսը վերսկսել է մարզումները։ Կարծում եմ՝ Բենզեման էլ պատրաստ կլինի երեքշաբթի։ Աստիճանաբար ֆուտբոլիստները վերադարձնում են լավագույն մարզավիճակը։ Մեծ վստահությամբ ենք մոտենում «Լիվերպուլի» դեմ խաղին»,- Անչելոտիի խոսքը մեջբերում է AS-ը։

«Լիվերպուլ» - «Ռեալ» հանդիպումը տեղի կունենա փետրվարի 21-ին Անգլիայում։

Իսպանիայի առաջնությունում «Ռեալը» 51 միավորով երկրորդն է եւ 5 միավոր հետ է առաջատար «Բարսելոնայից», որը 1 խաղ քիչ է անցկացրել։ «Օսասունան» 10-րդն է՝ 30 միավոր։