Անչելոտի․ Մենք շատ երջանիկ ենք, ցուցադրեցինք վարպետություն եւ որակ

Մադրիդի «Ռեալի» իտալացի գլխավոր մարզիչ Կառլո Անչելոտին մեկնաբանել է հաղթանակը աշխարհի ակումբային առաջնությունում։

«Մենք շատ երջանիկ ենք։ «Ռեալը» 8-րդ անգամ աշխարհի ակումբային չեմպիոն է։ Լավ խաղ էր, որակը բարձրության վրա էր։

Վինիսիուսը, Բենզեման, Վալվերդեն գերազանց կատարեցին առաջադրանքը։ Մենք ցուցադրեցինք վարպետություն եւ որակ»,- Անչելոտիի խոսքը մեջբերում է Marca-ն։

Մարոկկոյում անցկացված աշխարհի ակումբային առաջնության եզրափակիչում Արքայական թիմը 5:3 հաշվով պարտության էր մատնել Ասիայի ուժեղագույն թիմին՝ Սաուդյան Արաբիայի «Ալ Հիլյալին»։

«Ռեալն» աշխարհի ակումբային առաջնությունում հաղթել է նաեւ 2014, 2016, 2017 եւ 2018 թվականներին։ Մադրիդյան թիմը երեք անգամ էլ նվաճել է Միջմայրցամաքային գավաթը, որը վիճարկում էին Եվրոպայի եւ Հարավային Ամերիկայի ուժեղագույն ակումբները։