Էրդողանն ասել է, թե ինչից են կախված Թուրքիայի եւ Հայաստանի հարաբերությունները

Թուրքիայի եւ Հայաստանի հարաբերությունները դրական կլինեն, եթե կարգավորվեն Երեւանի եւ Բաքվի հարաբերությունները, առայժմ դրական պատկեր չկա, ասել է Թուրքիայի նախագահ Թայիփ Էրդողանը։

«Հայկական կողմի հետ մեր վերջին հանդիպումը եղել է Պրահայում, մենք նրանց բաց ասացինք. եթե դուք (Հայաստանը) դրական հուն ուղղեք հարաբերություններն Ադրբեջանի հետ, ապա Թուրքիայի հետ հարաբերությունները եւս կընթանան դրական ուղղությամբ։ Մենք Երեւանից դա ենք սպասում։ Առայժմ նման պատկեր չկա։ Ամեն բան կախված է Հայաստանի ղեկավարությունից։ Մենք թշնամիներ չենք ցանկանում, այլ բարեկամներ»,- ասել է լրագրողներին Էրդողանը Անկարայի «Էսենբողա» օդանավակայանում, Սամարղանդ թռչելուց առաջ։

Ավելի վաղ Թուրքիայի արտաքին գործերի նախարար Մեւլութ Չավուշօղլուն ասել էր, որ պատրաստ է հանդիպել Հայաստանի արտաքին գործերի նախարար Արարատ Միրզոյանի հետ, բայց ամսաթվի հարցում որոշակիություն առայժմ չկա։