«Նա շախմատ է խաղում գրեթե նույնքան լավ, որքան իմ iPhone-ը, բայց մնացած հարցերում ապուշ է». Մասկը վիրավորել է Կասպարովին

Միլիարդատեր Իլոն Մասկն արձագանքել է շախմատիստ Գարրի Կասպարովի հայտարարությանը, որով գրոսմայտերը Մասկի՝ ուկրաինական հակամարտությունը լուծելու առաջարկած ծրագիրն անվանել է «բարոյական իդիոտիզմ», գրում է kommersant.ru-ն։

Կասպարովը կարծիքով՝ մարդիկ, որոնք նստած են «Սիլիկոնային հովտում իրենց առանձնատներում» չեն կարող Կիևին ասել, թե ինչ անել: Սակայն Մասկը շախմատիստին հիշեցրել է, որ ինքն առանձնատներ չունի, և շախմատիստին անվանել է ապուշ ու հիմար։

«Չնայած ճիշտ է, որ Կասպարովը շախմատ է խաղում գրեթե նույնքան լավ, որքան իմ iPhone-ը, բայց մնացած հարցերում նա ապուշ է։ Ես նույնիսկ տուն չունեմ, էլ չեմ ասում «առանձնատուն», հիմա՛ր»,- թվիթերյան միկրոբլոգում գրել է Մասկը։

Միլիարդատերը հոկտեմբերի սկզբին Twitter-ում հրապարակել էր ռուս-ուկրաինական կարգավորման իր տեսլականը։ Նա առաջարկել է ՄԱԿ-ի հսկողության ներքո Ռուսաստանի կողմից օկուպացված տարածքներում հանրաքվեներ անցկացնել, Ղրիմը թողնել Ռուսաստանի կազմում, ապահովել թերակղզին ջրամատակարարմամբ և պահպանել Ուկրաինայի չեզոքությունը։ Կիևը քննադատել է Մասկի առաջարկները։