Բենզեմա․ Անչելոտին գերազանց մարզիչ է, ինձ վստահություն է հաղորդում

Աշխարհի լավագույն ֆուտբոլիստի «Ոսկե գնդակ» մրցանակին առաջին անգամ արժանացած ֆրանսիացի հարձակվող Քարիմ Բենզեման դրվատանքով է խոսել Մադրիդի «Ռեալի» իտալացի գլխավոր մարզիչ Կառլո Անչելոտիի մասին։

«Անչելոտին գերազանց մարզիչ է, նա ինձ վստահություն է հաղորդում։ Նա թույլ է տալիս ինձ խաղալ իմ ֆուտբոլը։ Անչելոտին ինձ միշտ խնդրում է ունենալ վճռական դեր խաղադաշտում, բայց ճնշում չի գործադրում։

Հիշում եմ՝ մի անգամ նա իր աշխատասենյակում ինձ հարցրեց, թե քանի գոլ կխփեմ մրցաշրջանի ընթացքում։ Նա խաղադրույք կատարեց եւ ասաց, որ կկարողանամ 50 գոլ խփել։ Քանի որ ես շատ ինքնավստահ եմ, վճռական եւ հավակնոտ՝ ասացի, որ կլինի։

Անչելոտին թույլ է տալիս քեզ խաղադաշտում անել այն, ինչ ցանկանում ես»,- Բենզեմայի խոսքը մեջբերում է Արքայական ակումբի կայքը։

Բենզեման անցած մրցաշրջանում դարձել է Իսպանիայի առաջնության եւ Չեմպիոնների լիգայի լավագույն ռմբարկուն։ Լա Լիգայի 32 խաղում նա խփել է 27 գոլ, Չեմպիոնների լիգայի 12 խաղում դարձել է 15 գոլի հեղինակ։