Բաքվում Ղարաբաղյան երկրորդ պատերազմի մասնակիցները ջարդել են նախարարության դռները

Բաքվում Ղարաբաղյան երկրորդ պատերազմի մի խումբ մասնակիցներ՝ մոտ 10 հոգի, այսօր բողոքի ակցիա են անցկացրել աշխատանքի եւ բնակչության սոցիալական պաշտպանության նախարարության շենքի առջեւ։

Ըստ Turan-ի՝ նրանց բողոքները կապված են եղել հաշմանդամություն եւ սոցիալական նպաստներ ստանալու հետ։ Վետերանները նախարար Սահիլ Բաբաեւից պահանջել են դուրս գալ իրենց մոտ եւ լուծել իրենց խնդիրները։

Մերժում ստանալով՝ նրանք ներխուժել են ընդունարան, որտեղ խառնաշփոթ է առաջացել։

Աշխատանքի նախարարության հասարակայնության հետ կապերի վարչությունն իր հերթին հաստատել է, որ վետերանների պահանջը կապված է հաշմանդամության գնահատման հետ։ «Յուրաքանչյուր բողոք գրանցված է ու կքննարկվի, արդյունքներին համապատասխան միջոցներ կձեռնարկվեն»,- ասել են աշխատանքի նախարարությունից։ Նույն աղբյուրը նշում է, որ որոշ վետերաններ «ընդունարանում անօրինական գործողություններ են կատարել, կոտրել են համակարգչային տեխնիկան, մուտքի դուռը, տուռնիկետը, վնասել պետական գույքը»։ «Այդ կապակցությամբ նույնպես միջոցներ կձեռնարկվեն»,- ասվում է նախարարության հաղորդագրության մեջ։