Ամերիկյան կոնսորցիումը «Չելսիի» համար կվճարի 5,2 միլիարդ դոլար

Ամերիկյան կոնսորցիումը կգնի Լոնդոնի «Չելսի» ֆուտբոլային ակումբը՝ վճարելով 4,25 միլիարդ ֆունտ ստերլինգ (5,2 միլիարդ դոլար), հաղորդում է ակումբի կայքը։

Կոնսորցիումի մասնակիցներն են ամերիկացի միլիարդատեր, բեյսբոլի «Լոս Անջելես Դոջերս» ակումբի համասեփականատեր Թոդ Բյոլին, ամերիկացի գործարար Մարկ Ուոլթդրը, շվեյցարցաի միլիարդատեր Հանսյորգ Վիսը եւ ամերիկյան Clearlake Capital ներդրումային ընկերությունը։

Գործարքին պետք է հավանություն տան Անգլիայի ֆուտբոլային իշխանությունները եւ Մեծ Բրիտանիայի կառավարությունը։

«Չելսիի» բաժնետոմսերի համար կոնսորցիումը կվճարի 2,5 միլիարդ ֆունտ ստերլինգ, որը կփոխանցվի ակումբի սեփականատեր, ռուսաստանցի գործարար Ռոման Աբրամովիչի սառեցված բանկային հաշվին Մեծ Բրիտանիայում։ Այդ գումարը կհատկացվի բարեգործության։

1,75 միլիարդ ֆունտ ստերլինգ կուղղվի ակումբի զարգացմանը, «Չելսիի» ակադեմիայի եւ երկու ստադիոնների ընդլայնմանը։