Նեյմարն՝ իրեն սուլող երկրպագուներին․ 3 տարի էլ կմնամ ՊՍԺ-ում

Ֆրանսիայի առաջնության 34-րդ տուրի հանդիպման ժամանակ ՊՍԺ-ի երկրպագուները դարձյալ սուլել են փարիզյան թիմի բրազիլացի հարձակվող Նեյմարին։ Արգենտինացի Մաուրիսիո Պոչետինոյի գլխավորած թիմը 1։1 հաշվով էր խաղացել «Լանսի» հետ եւ 10-րդ անգամ դարձել Ֆրանսիայի չեմպիոն։

«Իմ պայմանագրի ավարտին ՊՍԺ-ի հետ դեռ երեք տարի կա։ Ես 3 տարի էլ կմնամ այստեղ, նույնիսկ, եթե շարունակեն պարբերաբար սուլել ինձ։ Ավելի լավ է դադարեցնեն, օդը չի հերիքի»,- Նեյմարի խոսքը մեջբերում է ESPN-ը։

Նեյմարը 2017-ին է «Բարսելոնայից» տեղափոխվել ՊՍԺ, որը նրա համար վճարել է 222 միլիոն եվրո։

Ֆրանսիայի ընթացիկ առաջնությունում Նեյմարը մասնակցել է 19 հանդիպման, խփել 11 գոլ, կատարել 5 գոլային փոխանցում։