«Էվերտոնի» պատանի երկրպագուի մայր․ Որդիս ոչինչ չէր ասել Ռոնալդուին, որը հարվածեց նրա ձեռքին

«Էվերտոնի» պատանի երկրպագու Ջեյք Հարդինգի մայրը պատմել է «Էվերտոնի» ստադիոնում Կրիշտիանու Ռոնալդուի մասնակցությամբ տեղի ունեցած միջադեպի մասին։ «Մանչեսթեր Յունայթեդի» 37-ամյա պորտուգալացի հարձակվող հանդերձարան տանող միջանցքում հարվածել էր երեխային ձեռքին եւ կոտրել նրա հեռախոսը։

«Որդիս հեռախոսով նկարահանում էր «Մանչեսթեր Յունայթեդի» ֆուտբոլիստներին, որոնք հեռանում էին հանդերձարան։ Հետո որդիս իջեցրեց հեռախոսը, երբ Ռոնալդուի ոտքին արյուն տեսավ։ Նա ոչինչ չէր ասել, իսկ Ռոնալդուն ահավոր տրամադրություն ուներ, հարվածեց երեխայիս ձեռքին, գցեց հեռախոսը եւ առանց հետ նայելու գնաց հանդերձարան։

Որդիս աուտիզմ եւ դիսպրակսիա ունի։ Սա նրա առաջին ֆուտբոլային հանդիպումն էր ստադիոնում։ Հրաշալի օր էր մինչեւ այդ պահը»,- 14-ամյա պատանու մոր խոսքը մեջբերում է Liverpool Echo-ն։

Ռոնալդուն սոցիալական ցանցերում արած գրառումով ներողություն էր խնդրել եւ տղային հրավիրել «Մանչեսթեր Յունայթեդի» հանդիպմանը «Օլդ Տրաֆորդ»։

Անգլիայի առաջնության 32-րդ տուրում «Մանչեսթեր Յունայթեդը» Լիվերպուլում «Էվերտոնին» պարտվել էր 0։1 հաշվով։