Գվարդիոլա․ Կցանկանայի հավերժ մնալ «Մանչեսթեր Սիթիում», բայց այդպես չեմ անի

Անգլիայի չեմպիոն «Մանչեսթեր Սիթիի» կատալոնացի գլխավոր մարզիչ Խոսեպ Գվարդիոլան հայտարարել է, որ կցանկանար հավերժ ղեկավարել մանչեսթերյան թիմը։

«Ես կցանկանայի հավերժ մնալ «Մանչեսթեր Սիթիում», բայց այդպես չեմ անի։ Ավելի լավ աշխատավայր ինձ համար չկա։ Ես կարող էի 10 տարով երկարաձգել պայմանագիրը, բայց չեմ անի։ Բրազիլիայի հավաքականի հետ կապված խոսակցությունների աղբյուրն ինձ հայտնի չէ։ Ես ունեմ պայմանագիր եւ երջանիկ եմ իմ ակումբում»,- Գվարդիոլայի խոսքը մեջբերում է Sky Sports-ը։

51-ամյա մասնագետի պայմանագիրը նախատեսված է մինչեւ հաջորդ մրցաշրջանի ավարտը։ Նա 2016թ․ հուլիսից է գլխավորում «Մանչեսթեր Սիթին», որի հետ դարձել է Անգլիայի եռակի չեմպիոն, Անգլիայի լիգայի քառակի գավաթակիր, Անգլիայի կրկնակի սուպերգավաթակիր, մեկ անգամ էլ նվաճել է Անգլիայի գավաթը։