ՊՍԺ-ի ֆանատները սուլել են Մեսիին ու Նեյմարին

Ֆրանսիայի առաջնության 28-րդ տուրի ՊՍԺ - «Բորդո» (3։0) խաղում փարիզյան թիմի ֆանատներ սուլել են բրազիլացի հարձակվող Նեյմարին եւ արգենտինացի հարձակվող Լիոնել Մեսիին գնդակին ամեն հպման ժամանակ, հաղորդում է AS-ը։ Նեյմարին սուլել են նույնիսկ գոլ խփելուց հետո։

ՊՍԺ-ի ֆանատները դժգոհ են թիմի արդյունքներից։ Ակումբն արդեն ավարտել է պայքարը Ֆրանսիայի գավաթի խաղարկությունում եւ Չեմպիոնների լիգայում։

Ֆանատները նաեւ պարզել են պաստառներ՝ պահանջելով ակումբի մարզական տնօրեն Լեոնարդոյի հրաժարականը։

Ֆրանսիայի առաջնության 28 խաղից հետո ՊՍԺ-ն 65 միավորով գլխավորում է մրցաշարային աղյուսակը եւ 15 միավոր առաջ է երկրորդ տեղում գտնվող «Նիցայից»։