Ռանգնիկ․ Պետք է Ռոնալդուին 3 օրով ուղարկել Պորտուգալիա, հետո 2 օր հանգիստ տալ

Անգլիական «Մանչեսթեր Յունայթեդի» գերմանացի գլխավոր մարզիչ Ռալֆ Ռանգնիկը կատակել է Կրիշտիանու Ռոնալդուի հեթ-տրիկի մասին։

37-ամյա պորտուգալացի հարձակվողի 3 գոլի շնորհիվ մանչեսթերյան թիմը Անգլիայի առաջնության 29-րդ տուրի տնային խաղում 3։2 հաշվով հաղթել է Լոնդոնի «Տոտենհեմին»։

Անցած շաբաթ Ռոնալդուն ազդրի վնասվածքի պատճառով բաց էր թողել «Մանչեսթեր Սիթիի» դեմ հանդիպումը (1:4) եւ մեկնել էր Պորտուգալիա։

«Խաղից հետո կատակում էինք, որ հավանաբար, պետք է հետագայում էլ Ռոնալդուին երեք օրով ուղարկել Պորտուգալիա, հետո էլ երկու օրվա հանգստի հնարավորություն տալ։

Հինգշաբթի նա մարզվում էր նախկին մակարդակի վրա, եւ այդ պատճառով ես նրան ընդգրկեցի մեկնարկային կազմում։ Հնարավոր է՝ մինչեւ մրցաշրջանի վերջ այդպես էլ անենք»,- Ռանգնիկի խոսքը մեջբերում է ակումբի մամուլի ծառայությունը։

«Տոտենհեմին» խփած 3 գոլերի շնորհիվ Ռոնալդուն գերազանցեց ավստրիացի Յոզեֆ Բիցանի ռեկորդը՝ 805 գոլ: Պորտուգալացին պաշտոնական խաղերում խփել է 807 գոլ։