Գարեթ Սաութգեյթը երկարաձգեց պայմանագիրը Անգլիայի հավաքականի հետ

Գարեթ Սաութգեյթը երկարաձգել է պայմանագիրը Անգլիայի հավաքականի հետ, հաղորդում է Անգլիայի ֆուտբոլային ասոցիացիայի կայքը։ Գլխավոր մարզիչի նոր պայմանագիրը նախատեսված է մինչեւ Եվրո-2024-ի ավարտը։

«Շատ ուրախ եմ, որ երկարաձգեցի պայմանագիրը։ Ուրախ եմ, որ ունեմ աշխատանքս շարունակելու հնարավորություն։ Անգլիայի հավաքականում աշխատանքը պատիվ ու արտոնություն է»,- ասել է Գարեթ Սաութգեյթը, որի նախորդ պայմանագիրը նախատեսված է մինչեւ 2022 թվականը։

Անգլիայի հավաքականը Սաութգեյթի ղեկավարությամբ հասել է 2018թ. աշխարհի առաջնության կիսաեզրափակիչ, Եվրո-2020-ի եզրափակիչում էլ հետխաղային 11 մետրանոցներով պարտվեց Իտալիային։

Սաութգեյթը Անգլիայի հավաքականը գլխավորում է 2016 թվականից, դրանից առաջ Անգլիայի երիտասարդական թիմի գլխավոր մարզիչն էր։