Մյանմայում ամերիկացի լրագրողը դատապարտվել է 11 տարվա ազատազրկման

Մյանմայի ռազմական դատարանը 11 տարվա ազատազրկման է դատապարտել ամերիկացի լրագրող Դենի Ֆենսթերին. նա մեղավոր է ճանաչվել մի քանի մեղադրանքներով, այդ թվում՝ «կեղծ կամ սադրիչ տեղեկատվության տարածումը հրահրելու» համար, հայտնում է AP-ն։

Ֆենսթերը՝ Frontier Myanmar առցանց ամսագրի խմբագիրը, նաեւ մեղավոր է ճանաչվել անօրինական կազմակերպությունների հետ կապ հաստատելու եւ վիզային ռեժիմը խախտելու մեջ, ասել է նրա փաստաբան Թան Զաու Աունգը։

Ֆենսթերը կալանքի տակ է գտնվում մայիսից։ Նրան եւս երկու լրացուցիչ մեղադրանք է առաջադրվել մեկ այլ դատարանում՝ հակաահաբեկչական եւ պետական ​​դավաճանության եւ հրահրման մասին օրենքների խախտման համար։

Ֆենսթերը ձերբակալվել էր Յանգոնի միջազգային օդանավակայանում մայիսի 24-ին, երբ պատրաստվում էր նստել Միացյալ Նահանգներ թռնող ինքնաթիռը:

Նա միակ օտարերկրյա լրագրողն է, ով դատապարտվել է ծանր հանցանքի համար այն բանից հետո, երբ փետրվարին բանակը զավթեց իշխանությունը՝ տապալելով Դաու Աուն Սան Սու Չժիի ընտրված կառավարությունը:

Զինվորական իշխանությունը դաժանորեն ճնշեց մամուլի ազատությունը՝ փակելով գրեթե բոլոր քննադատական ​​լրատվամիջոցները եւ ձերբակալելով մոտ 100 լրագրողի, որոնցից մոտ 30-ը մնում է բանտում։