Շվեդիայի վարչապետը հրաժարականի դիմում է ներկայացրել

Շվեդիայի վարչապետ Ստեֆան Լյովենը հրաժարականի դիմում է ներկայացրել, հայտնում է «ՌԻԱ Նովոստին»՝ հղում անելով Agence France Presse-ին։

«Չորեքշաբթի օրը Շվեդիայի վարչապետ Ստեֆան Լոուենը հրաժարական է տվել, ինչը շատ սպասված քայլ էր, որը ճանապարհ է հարթում հաջորդ տարվա համընդհանուր ընտրություններից առաջ նրա նշանակված իրավահաջորդ Մագդալենա Անդերսոնի համար»,- ասվում է գործակալության հայտարարության մեջ:

Անցյալ շաբաթ հաղորդվել էր, որ Շվեդիայի ֆինանսների նախարար Մագդալենա Անդերսոնն ընտրվել է երկրի իշխող Սոցիալ-դեմոկրատական աշխատավորական կուսակցության նախագահի պաշտոնում, ապագայում նա կարող է դառնալ թագավորության առաջին կին վարչապետը։

Լյովենը Շվեդիայի Սոցիալ-դեմոկրատական կուսակցության ղեկավարությունը ստանձնել է 2012 թվականին եւ հաղթանակ է տարել երկու ընտրություններում՝ 2014 եւ 2018 թվականներին: Վերջին շրջանում, սակայն, կուսակցության դիրքերը սասանվել են, ինչն արտահայտվել է Շվեդիայի քաղաքացիների շրջանում անցկացված սոցհարցումների արդյունքներով։ Ինչպես օգոստոսին ասել էր վարչապետը, կուսակցությանը նոր առաջնորդ է պետք 2022 թվականի ընտրություններից առաջ։

Անդերսոնը Շվեդիայի ֆինանսների նախարարի պաշտոնը ստանձնել է 2014 թվականին՝ դառնալով կառավարությունում այս պաշտոնը զբաղեցնող առաջին կինը։