Բռնցքամարտ. Հենրիկ Ճղրիկյանը՝ Եվրոպայի երիտասարդների չեմպիոն

Եվրոպայի երիտասարդների առաջնությունը հայ բռնցքամարտիկներն ավարտում են հերթական ոսկե նվաճմամբ։ Այս անգամ չեմպիոնական տիտղոս է նվաճել 86 կգ քաշային Հենրիկ Ճղրիկյանը։

Այս մասին հայտնում է Հայաստանի բռնցքամարտի ֆեդերացիայի մամուլի քարտուղարությունը:

Գյումրու մարզադրոցը ներկայացնող բռնցքամարտիկը եզրափակչում տպավորիչ հաղթանակ է տոնել չեխ Դավիդ Պոլակի նկատմամբ։ Մեր մարզիկը շատ գրագետ մենամարտ է անցկացրել և նույնիսկ 3-րդ ռաունդում նոկդաունի ենթարկել մրցակցին։

Այսպիսով Հայաստանի հավաքականը առաջնությունն ավարտում է 2 ոսկե, 2արծաթե և մեկ բրոնզե մեդալով։ Չեմպիոն էր դարձել նաև 51 կգ քաշային Հենրի Սահակյանը։ 60 կգ քաշային Էլիդա Քոչարյանը և 57 կգ քաշային Մանվել Պետրոսյանը նվաճել էին արծաթե մեդալ, իսկ 60 կգ քաշային Էրիկ Իսրայելյանը արժանացել էր բրոնզե մեդալի։

Մեր երկիրը Եվրոպայի առաջնությունում թիմային պայքարում գրավել է 3-րդ տեղը։