Թրամփը նոր սոցիալական ցանց է ստեղծում

ԱՄՆ նախկին նախագահ Դոնալդ Թրամփը, ում օգտահաշիվները հունվարին արգելափակվել էին սոցցանցերի մեծ մասի կողմից, ներառյալ Facebook-ը և Twitter-ը, հայտարարել է սեփական սոցցանց ստեղծելու մտադրության մասին:

Ըստ Trump Media & Technology Group կորպորացիայի, որը միավորում է Թրամփի լրատվական միջոցները, այն կկոչվի TRUTH («Ճշմարտություն»): Հրավիրված մասնակիցների համար թեստային ռեժիմում գործարկումը տեղի կունենա նոյեմբերին, իսկ մյուս օգտատերերի համար սոցցանցը կսկսի աշխատել հաջորդ տարվա սկզբին:

Ինչպես նշվում է Թրամփի անունից տարածված հաղորդագրության մեջ, սոցցանց ստեղծելու նպատակը խոշոր տեխնոլոգիական ընկերություններին դիմակայելն է, որոնք ավելի վաղ արգելափակել էին նախկին նախագահի օգտահաշիվները: «Մենք ապրում ենք մի աշխարհում, որտեղ Թալիբանն ակտիվորեն գործում է Twitter-ում, իսկ ձեր սիրելի նախագահին լռեցնում են: Դա անընդունելի է»,- պնդում է Թրամփը: