Թուրքիան ԱՄՆ-ից 40 նոր F-16 կործանիչ է խնդրել

 Թուրքիան ուզում է ԱՄՆ-ից 40 հատ F-16 block 70 կործանիչներ գնել, ինչպես նաև ամերիկյան կողմի օգնությամբ արդիականացնել արդեն գոյություն ունեցող 80 F-16-ի նախորդ տարբերակները։ Տեղեկությունը հայտնում է հունական Defence review պարբերականը։
Աղբյուրի համաձայն՝ Թուրքիայի պաշտպանության նախարարությունը համապատասխան մտադրությամբ նամակ է հղել․ այսպես է կոչվում ԱՄՆ-ի հետ պաշտպանական համաձայնագրի առաջին փուլը։ Այնուհետև ամերիկյան կողմը պետք է անհրաժեշտ ստուգումներ անցկացնի ԱՄՆ-ի օրենքներին ապագա գործարքի համապատասխանությանվերաբերյալ, հաշվարկի պահանջվող համակարգերի գինն ու ԱՄՆ-ի Կոնգրեսին ծանուցի՝ ԱՄՆ-ի Պետդեպարտամենտի հավանությունը ստանալուց հետո:
Հատկանշական է, որ ավելի վաղ Անկարայում հայտնել էին Ռուսաստանի հետ 4++ սերնդի Սու-35 կործանիչների մատակարարման շուրջ բանակցությունների մասին, ինչը երկրորդ խոշոր գործարքը կլիներ C-400 զենիթահրթիռային համալիրների մատակարարումից հետո: Ի դեպ, ռուսական համակարգերի պատճառով ամերիկացիները Թուրքիային հանել են հինգերորդ սերնդի F-35 կործանիչների արտադրության ու մատակարարման ծրագրից։
Խոսելով ԱՄՆ-ի արձագանքի մասին՝ Թուրքիայի իշխանությունն ու նախագահ Ռեջեփ Էրդողանը բազմիցս ասել են, որ ոչ ոք իրավունք չունի իրենց մատնանշել՝ որտեղից զենք գնել։