Սլովակիա Հռոմի պապի այցի նախապատրաստումը եզրափակիչ փուլ է մտել

Սեպտեմբերի 12-15-ը Սլովակիա Հռոմի պապի այցի նախապատրաստումը եզրափակիչ փուլ է մտել, հայտնում է ՏԱՍՍ-ը՝ հղում անելով Բրատիսլավայի արքեպիսկոպոսի քարտուղարությանը:

«Մենք սկսել ենք Ֆրանցիսկոս պապին դիմավորելու անմիջական նախապատրաստումը: Ամբողջ թափով ընթանում է հավատացյալների գրանցումը, որոնք Սուրբ Հոր օրհնությունը ստանալու համար Եվրոպայի բոլոր ծայրերից գալու են Սլովակիա: Շաշթին-Ստրաժեում սեպտեմբերի 15-ին վերջին պապական այցի համար, ինչպես հայտնի է այս պահին, ավելի քան 30 000 ուխտագնացներ կժամանեն»,- նշել է քարտուղարությունը:

Ակնկալվում է, որ պոնտիֆիկի մասնակցությամբ միջոցառումներին կգան մոտ 500 000 հավատացյալներ: Մուտքը թույլատրվում է միայն կորոնավիրուսի դեմ պատվաստման ամբողջական կուրսն անցածների համար:

Սլովակիայի կառավարությունը գրեթե 5,5 մլն եվրո է հատկացրել Հռոմի պապի այցն ապահովելու համար: Կառավարությունը նաեւ հավանություն է տվել նրա գտնվելու վայրերում անվտանգությունն ու կարգուկանոնն ապահովելու նպատակով 1300 զինծառայողների ներգրավվածությանը, որոնք կօգնեն ոստիկանությանը: