Սիլվիո Բեռլուսկոնին հոսպիտալացվել է Միլանում

Իտալիայի նախկին վարչապետ Սիլվիո Բեռլուսկոնին հետազոտության համար հոսպիտալացվել է Միլանում, հաղորդել է Rai News գործակալությունը:

Նախկին վարչապետը «առօրյա ստուգում» կանցնի Միլանի «Սան Ռաֆայելե» հիվանդանոց: Նրան նման ընթացակարգ է նշանակվել COVID-19-ից ապաքինվելուց հետո: Ըստ Իտալիայի խորհրդարանի աղբյուրների՝ Forza Italia կուսակցության առաջնորդի մոտ հիվանդությունը բարդ ընթացք է ունեցել եւ որոշ կողմնակի ազդեցություններ պահպանվում են ապաքինումից հետո:

2021 թվականի հունվարին հաղորդվել է, որ 84-ամյա քաղաքական գործիչը հոսպիտալացվել է Մոնակոյում՝ սրտի հետ կապված խնդիրների պատճառով: Բեռլուսկոնին այցելել էր Ֆրանսիայում բնակվող դստերը: Նախկին վարչապետի մոտ առաջացած առիթմիայի պատճառով նրա անձնական բժիշկը որոշել է տեղափոխել նրան Մոնակոյի սրտաբանական կենտրոն: