Կլինսմանը, Ռանիերին, Ադվոկատն ու Կապելոն ցանկացել են գլխավորել Ռուսաստանի հավաքականը

Հայտնի մարզիչների գործակալներն իրենց հաճախորդների ծառայություններն են առաջարկել Ռուսաստանի ֆուտբոլային միությանը ազգային հավաքականի գլխավոր մարզիչ Ստանիսլավ Չերչեսովի հրաժարականից առաջ եւ հետո, հաղորդում է РБК–ն։

Առաջարկած թեկնածուների թվում են եղել գերմանացի Յուրգեն Կլինսմանը, իտալացի Կլաուդիո Ռանիերին, հոլանդացի Դիկ Ադվոկատը եւ իտալացի Ֆաբիո Կապելոն։

Ռուսաստանի ֆուտբոլային միությունը ազգային հավաքականի գլխավոր մարզիչի պաշտոնի համար դիտարկում է 3 թեկնածություն՝ Շտեֆան Կունց, Վալերի Կարպին, Կուրբան Բերդիեւ։

Ֆավորիտ է համարվում Կունցը, որը Գերմանիայի երիտասարդական հավաքականի գլխավոր մարզիչն է 2016 թվականից։ Նրա ղեկավարությամբ գերմանացիները երկու անգամ նվաճել են Եվրոպայի երիտասարդական չեմպիոնի տիտղոսը։

Կարպինը 2017 թվականից գլխավորում է «Ռոստովը»։ Բերդիեւի նախորդ ակումբը եղել է «Ռուբինը»։ Այժմ նա ղազախական «Կայրաթի» դիտորդական խորհրդի նախագահի խորհրդականն է։

Ռուսաստանի հավաքականի գլխավոր մարզիչի պաշտոնը թափուր է հուլիսի 8-ից։ Ստանիսլավ Չերչեսովը Եվրո-2020-ի եզրափակիչ մրցաշարի խմբային փուլի արգելքը չհաղթահարելուց հետո հեռացվեց։