Կումանը՝ Մեսիի ապագայի մասին. Եթե խնդիրը լուծված չէ, կա անհանգստանալու առիթ

«Բարսելոնայի» հոլանդացի գլխավոր մարզիչ Ռոնալդ Կումանն անդրադարձել է արգենտինացի հարձակվող Լիոնել Մեսիին, որի պայմանագիրը կատալոնական ակումբի ավարտվել է հուլիսի 1-ին:

«Եթե խնդիրը լուծված չէ, ապա կա անհանգստանալու առիթ: Վստահ եմ, որ Ժոան Լապորտան կկարգավորի այդ հարցը, քանի որ նրա ու ակումբի համար կարևոր է, որ աշխարհի լավագույն խաղացողը չհեռանա:

Ակումբի նախագահն ինձ ասել է, որ չարժե չանհանգստանալ: Վստահ եմ, որ առաջիկա մի քանի օրում մենք կկարողանանք պայմանավորվել Մեսիի հետ: Նա միշտ ցուցադրել է, որ ցանկանում է մնալ «Բարսելոնայում»»,- Կումանի խոսքը մեջբերում է Marca-ն:

Հիշեցնենք, որ «Բարսելոնայի» ավագը ստացել է ազատ գործակալի կարգավիճակ: Այս օրերին 34-ամյա հարձակվողն Արգենտինայի հավաքականի կազմում մասնակցում է Բրազիլիայում անցկացվող Ամերիկայի գավաթի խաղարկությանը:

Նախորդ ամռանը Մեսին ցանկանում էր հեռանալ «Բարսելոնայից», սակայն ակումբը բաց չթողեց նրան:

Ավարտված մրցաշրջանում արգենտինացին «Բարսելոնայի» կազմում բոլոր մրցաշարերում անցկացրել է 47 հանդիպում, դարձել 38 գոլի ու 14 գոլային փոխանցման հեղինակ: Նա 2005 թվականից է հանդես գալիս կատալոնացիների գլխավոր թիմում: