ԱՄՆ ավելի քան 30 նահանգ հակամենաշնորհային հայց է ներկայացրել Google-ի դեմ

Վաշինգտոնը եւ 36 նահանգ չորեքշաբթի հայց է ներկայացրել Google ընկերության դեմ հակամենաշնորհային օրենսդրությունը խախտելու պատճառով Android օպերացիոն համակարգով սարքի հավելվածների խանութի աշխատանքում, տեղեկացնում է ՏԱՍՍ-ը՝ հղում կատարելով Politico-ին։

Պարբերականի տվյալներով՝ հայցը ներկայացվել է Կալիֆոռնիայի դաշնային դատարան։ Հայցի պատճառը կորպորացիայի վերահսկողությունն է Google Play հավելվածների խանութների նկատմամբ։ Մասնավորապես, թերթը հավաստիացնում է, որ հայցի շրջանակում վիճարկվելու է կորպորացիայի կողմից 30 տոկոս միջնորդավճարի գանձումը էլեկտրոնային ապրանքների վաճառքից եւ հավելվածի ներքին սպասարկումներից։

ԱՄՆ արդարադատության նախարարությունը հոկտեմբերի 20-ին քաղաքացիական հայց էր ներկայացրել Google կորպորացիային, քանի որ վերջինը, ըստ իշխանությունների, վնաս է հասցնում մրցակցությանը օնլայն հարթակներում։ Որպես հայցվոր դաշնային կառավարության հետ հանդես է գալիս ամերիկյան 11 նահանգ։ Դրանց գլխավոր դատախազները Հանրապետական կուսակցության ներկայացուցիչներ են։

Ավելի վաղ Google-ի նկատմամբ արդեն ներկայացվել էր երեք հակամենաշնորհային հայց։ Դրանցից մեկով կորպորացիան մեղադրվում է համանուն ցանց ունեցող Facebook ընկերության հետ հակամենաշնորհային գործարքի մեջ։ Հայցում նշվում է, որ 2017թ. Facebook-ը դարձել է Google-ի լուրջ մրցակիցը ինտերնետում գովազդի շուկայում։ Ընկերություններն այս առնչությամբ իբր պայմանավորվել են խուսափել մրցակցությունից մի շարք ոլորտներում։