Կամո Հովհաննիսյանն ու Տիգրան Բարսեղյանը՝ տուրի խորհրդանշական հավաքականում

Հայաստանի հավաքականի խաղացողներ, «Կայրաթի» ձախ պաշտպան Կամո Հովհաննիսյանն ու «Աստանայի» ձախ կիսապաշտպան Տիգրան Բարսեղյանն ընդգրկվել են Ղազախստանի առաջնության 19–րդ տուրի խորհրդանշական հավաքականում, Sports.kz–ի վարկածով։

«Կամո Հովհաննիսյանի արդյունավետությամբ հավասարը չկար անցած տուրում։ Փոխարինման դուրս գալով երկրորդ տուրում՝ նա աչքի ընկավ մեկ գոլով եւ երկու գոլային փոխանցմամբ։

Տիգրան Բարսեղյանը լավագույնն էր իր թիմի կազմում՝ մեկ գոլ, երկու գոլային փոխանցում»,– գրում է ղազախական կայքը։

Ղազախստանի առաջնության 19–րդ տուրում «Աստանան» 4։3 հաշվով պարտության էր մատնել Կարագանդայի «Շախտյորին» եւ 41 միավորով երկրորդ տեղում՝ առաջատար «Տոբոլից» հետ մնալով 1 միավոր։

«Կայրաթն» Ալմաթիում ընդունել էր «Ատիրաուին» եւ առավելության հասել 5։0 հաշվով։ «Կայրաթը» 37 միավորով երրորդ տեղում է։