Բրազիլիան զորք կկիրառի Ամազոնում անտառահատումների դեմ պայքարի համար

Բրազիլիայի նախագահ Ժաիր Բոլսոնարոն հրամանագիր է ստորագրել, որով երկրի իշխանություններին կթույլատրվի Ամազոնի խոնավ արևադարձային անտառների շրջակայքում զինծառայողներ տեղակայել՝ բնապահպանական հանցագործությունների և ապօրինի անտառահատումների դեմ պայքարելու համար, հաղորդում է AP-ն։

Հրամանագիրը նախատեսում է զինծառայողներին ուղարկել Ամազոնաս, Մատու Գրոսու, Պարա և Ռոնդոնիա նահանգներ, որտեղ նրանք կմնան մինչև օգոստոսի 31-ը:

Հրամանագրի տեքստի համաձայն՝ զինված ուժերը կգործեն տեղական իշխանությունների և շրջակա միջավայրի պահպանության մարմինների հետ համակարգմամբ:

Մայիսին Տիեզերական հետազոտությունների ազգային ինստիտուտը հայտնել էր, որ Ամազոնում անտառահատումների տեմպերը շարունակում են աճել: Կազմակերպության առցանց հարթակի տվյալների համաձայն՝ 2021 թվականի ապրիլին անտառահատումների թիվն անցյալ տարվա նույն ժամանակահատվածի համեմատ ավելացել է 43 տոկոսով։

Բրազիլիայի նախագահը, ապրիլի վերջին ելույթ ունենալով կլիմայական գագաթնաժողովում, խոստացել էր պայքարել ապօրինի անտառահատումների դեմ։