Ֆեդերերը վստահ չէ, որ կկարողանա մասնակցել Տոկիոյի Օլիմպիական խաղերին

«Մեծ սաղավարտի» մրցաշարերի 20-ակի հաղթող Ռոջեր Ֆեդերերը վստահ չէ, որ կմասնակցի Տոկիոյի Օլիմպիական խաղերին։ Նա որոշումը կընդունի Ուիմբլդոնի մրցաշարից հետո, որը կմեկնարկի հունիսի 28-ին։

«Տարիքի հետ մենք պետք է ավելի ընտրողական վերաբերմունք ցուցաբերենք մրցաշարերին։ Մենք չենք կարող մասնակցել բոլոր մրցաշարերին անընդմեջ»,- 39-ամյա շվեյցարացի թենիսիստի խոսքը մեջբերում է ESPN-ը։

Ֆեդերերը Ուիմբլդոնի մրցաշարի առաջին շրջանում կմրցի ֆրանսիացի Ադրիան Մանարինոյի հետ։ Ֆեդերերը Ուիմբլդոնի մրցաշարի 8-ակի հաղթող է։

Հիշեցնենք, որ աշխարհի առաջին ռակետ, սերբ Նովակ Ջոկովիչը կմասնակցի Տոկիոյի Խաղերին, իսպանացի Ռաֆայել Նադալը առողջական խնդիրների պատճառով որոշել է չմասնակցել։

Կորոնավիրուսի համավարակի հետեւանքով մեկ տարով հետաձգված Տոկիոյի Օլիմպիական խաղերը կանցկացվեն հուլիսի 23-ից օգոստոսի 8-ը։