Կապառոս. Շվեդիայի դեմ խաղադաշտ դուրս կգան տղաներ, որոնք չեն մասնակցել նախորդ հանդիպմանը

Շվեդիա – Հայաստան հանդիպման նախախաղային ասուլիսում Հայաստանի հավաքականի իսպանացի գլխավոր մարզիչ Խոակին Կապառոսը խոսել է թիմի վիճակի եւ նպատակների մասին։

«Հավաքականի ֆուտբոլիստները հասցրել են վերականգնվել Խորվաթիայի հավաքականի հետ ընկերական խաղից հետո։

Շվեդիայի դեմ խաղադաշտ դուրս կգան տղաներ, որոնք չեն մասնակցել նախորդ հանդիպմանը։ Մեր նպատակը նոր ֆուտբոլիստներին տեսնել է ուժեղ թիմերի հետ խաղերում։ Կան տղաներ, որոնք 10–15 օր չէին մարզվում, արձակուրդում էին, սակայն այնքան են սիրում հավաքականը, այնքան հայրենասեր են, որ եկել են եւ պատրաստ են խաղադաշտ դուրս գալ։ Մենք ցանկանում ենք բոլորին հնարավորություն տալ։

Թիմի ճամբարում են հավաքականի նախկին խաղացողներ Լեւոն Պաչաջյանն ու Յուրա Մովսիսյանը, քանի որ կարող են օգտակար լինել թիմի ֆուտբոլիստներին։ Կտեսնեք, որ առաջիկա խաղի բոլոր մասնակիցները իրենց լավագույն որակները կդրսեւորեն։

Պետք է բարձր գնահատել Վարազդատ Հարոյանի նվիրվածությունը։ Նա վնասվածք էր ստացել, սակայն միացավ թիմին։ Նա հիմա ավելի լավ վիճակում է, բայց մենք չենք շտապի։ Վաղը պարզ կլինի, բայց նախնական կարելի է ասել, որ նա դժվար թե մասնակցի խաղին»,– ասել է Խոակին Կապառոսը։

Հայաստանի հավաքականը Շվեդիայի հավաքականի հետ ընկերական խաղը կանցկացնի հունիսի 5–ին Ստոկհոլում։ Մեկնարկը՝ Երեւանի ժամանակով 22։45–ին։