«Ռոլան Գարոս»․ Աշխարհի առաջին ռակետն ավարտեց ելույթը

Աշխարհի կանանց առաջին ռակետ Էշլի Բարտին ավարտել է ելույթը թենիսի Ֆրանսիայի բաց առաջնությունում, որը «Մեծ սաղավարտ» շարքի երկրորդ մրցաշարն է։

Երկրորդ շրջանում ավստրալացի թենիսիստուհին չի կարողացել շարունակել լեհ Մագդա Լինետի հետ մրցախաղը: Առաջին սեթում 26-ամյա Լինետը հաղթել է 6:1 հաշվով, իսկ երկրորդում 25-ամյա Բարտին վնասվածքի պատճառով հրաժարվել է պայքարից 2:2 հաշվի ժամանակ:

Էշլի Բարտին «Ռոլան Գարոսի» հաղթողի կոչումը նվաճել է 2019 թվականին՝ նվաճելով կարիերայի առայժմ միակ տիտղոսը «Մեծ սաղավարտի» մրցաշարերում:

Հիշեցնենք, որ ավելի վաղ Ֆրանսիայի բաց առաջնությունում մրցապայքարը շարունակելուց հրաժարվել էր աշխարհի երկրորդ ռակետ, ճապոնացի Նաոմի Օսական, որը նման որոշում էր կայացրել կազմակերպիչների հետ տարաձայնության պատճառով: