Kathimerini. ԱՄՆ-ը ձգտում է մեծացնել ռազմական ներկայությունը Հունաստանում` Թուրքիայի անհուսալիության կասկածների պատճառով

Միացյալ Նահանգները ձգտում է մասնակիորեն մեծացնել իր ռազմական ներկայությունը Հունաստանում` մասամբ Թուրքիայի հուսալիության վերաբերյալ կասկածների պատճառով, գրում է հունական Kathimerini թերթը:

Թերթի աղբյուրների համաձայն՝ դիտարկվում է ամերիկյան զորքերի տեղակայման ընդլայնման հնարավորությունը, քանի որ Հունաստանի եւ Թուրքիայի միջեւ հարաբերությունները շարունակում են վատթարանալ: Նախագահ Ռեջեփ Թայիփ Էրդողանի օրոք դաշնակից Թուրքիայի հուսալիության նկատմամբ վստահության նվազումը նույնպես դիտվում է որպես Հունաստանում իր ներկայությունն ընդլայնելու ԱՄՆ որոշման գործոն:

Վերջին տարիներին ԱՄՆ զինվորականներն ամրապնդել են իրենց ներկայությունը Հունաստանում եւ ընդլայնել են համագործակցությունը հույն գործընկերների հետ: ԱՄՆ-ն արդեն իր ուժերը տեղակայել է Սուդա նեղուցում գտնվող ռազմածովային բազայում, ինչպես նաեւ Կրետեում, Ալեքսանդրապոլիսում, Լարիսայում եւ Ստեֆանովիկեյոում: Պլանավորվում է եւս չորս բազա ավելացնել՝ Հունաստանը Վաշինգտոնին ընտրության 22 տարբերակ է տվել:

ԱՄՆ-ը մի քանի ռազմաբազաներ ունի Թուրքիայում, այդ թվում՝ Ինջիրլիքը։ Թուրք քաղաքական գործիչները պարբերաբար սպառնում են վտարել ամերիկյան զինվորականներին այդ բազաներից՝ տարաձայնությունների ֆոնին, այդ թվում` ԱՄՆ նախագահ Ջո Բայդենի կողմից Հայոց ցեղասպանության ճանաչումից հետո:

Այլ տարաձայնությունների թվում է Թուրքիայի կողմից ռուսական С-400 հակահրթիռային պաշտպանության համակարգի գնումը եւ ԱՄՆ աջակցությունը սիրիացի քուրդ ապստամբներին, որոնց Անկարան համարում է ահաբեկիչներ:

Հունաստանը եւ Թուրքիան բանակցությունների նոր փուլ կսկսեն՝ փորձելով լուծել իրենց որոշ տարաձայնությունները:

Երկու հարեւանների միջեւ թշնամանքի հիմքում ընկած է Միջերկրական ծովի արեւելքում Թուրքիայի կողմից այն ջրերի պահանջները, որոնց հավակնում են Հունաստանն ու Կիպրոսը, եւ որտեղ բնական գազի մեծ հանքավայրեր կան: Հունաստանը եւ Թուրքիան նաեւ վաղեմի տարաձայնություններ ունեն Էգեյան ծովում ջրային սահմանների շուրջ: