Սերխիո Ագուերոն 2 տարվա պայմանագիր կկնքի «Բարսելոնայի» հետ

Անգլիայի չեմպիոն «Մանչեսթեր Սիթիի» հարձակվող Սերխիո Ագուերոն կարիերան կշարունակի «Բարսելոնայում»։ Արգենտինացի ֆուտբոլիստը երկու տարվա պայմանագիր կկնքի կատալոնական ակումբի հետ, հաղորդում է ESPN–ը։

32–ամյա Ագուերոյի պայմանագիրը մանչեսթերյան ակումբի հետ կավարտվի հունիսի 30–ին։ Կողմերը պաշտոնապես հայտարարել են համագործակցությունը չշարունակելու մասին։

Ընթացիկ մրցաշրջանում Ագուերոն «Մանչեսթեր Սիթիի» հետ դարձել է Անգլիայի չեմպիոն, Անգլիական լիգայի գավաթակիր։ Մայիսի 29–ին «Մանչեսթեր Սիթին» Լոնդոնի «Չելսիի» հետ Պորտուում անցկացվելիք եզրափակիչում կվիճարկի Չեմպիոնների լիգայի գավաթը։

Ագուերոն 2011-ին Մադրիդի «Աթլետիկոյից» է տեղափոխվել «Մանչեսթեր Սիթի» և դարձել անգլիական ակումբի պատմության լավագույն ռմբարկուն ու ամենաշատ տիտղոս նվաճած ֆուտբոլիստը (15 տիտղոս):