Իսրայելի մի շարք քաղաքներում տագնապի ազդանշաններ են հնչել

Իսրայելի հարավային քաղաքներից մի քանիսում տագնապի ազդանշաններ են հնչում, որոնք նախազգուշացնում են հնարավոր հրթիռակոծման մասին: Այս մասին հայտնում է «ՌԻԱ Նովոստի»-ն` հղում անելով իսրայելական բանակի մամուլի ծառայությանը:

Հաղորդվում է, որ տեղի ժամանակով ժամը երեքից սկսած` տագնապի ազդանշանները բազմիցս հնչել են Աշդոդ, Աշկելոն, Բեեր Շևա քաղաքներում:

Հիշեցնենք, որ Երուսաղեմում հուզումները սկսվել են մայիսի 7-ին: Արաբ երիտասարդների և ոստիկանության միջև բախումները բռնկվել են մայիսի 8-ի երեկոյան, այնուհետև շարունակվել՝ տարածվելով Տաճարի լեռան և Ալ-Աքսա մզկիթի տարածքում: Դրանք իրենց գագաթնակետին հասել են մայիսի 10-ին, երբ հրեաները նշում են Երուսաղեմի օրը: Բախումների սկզբից ի վեր Գազայի հատվածից ավելի քան 1000 հրթիռ է արձակվել Իսրայելի ուղղությամբ: 850 հրթիռ հատել է Իսրայելի սահմանը, ևս 200-ը ընկել՝ Գազայի հատվածում: Բախումների ընթացքում կան զոհեր և վիրավորներ, այդ թվում՝ խաղաղ բնակչության շրջանում: Իսրայելի բանակը հայտարարել Է, որ ոչնչացրել Է ՀԱՄԱՍ-ի հետախուզության հանգուցային դեմքերի, այդ թվում՝ ՀԱՄԱՍ-ի ռազմական հետախուզության անվտանգության բաժնի ղեկավարին ու նրա տեղակալին: