Չերչեսովը պատմել է, թե ինչու է Արսեն Զախարյանին հրավիրել Ռուսաստանի հավաքական

Ֆուտբոլի Ռուսաստանի ազգային հավաքականի գլխավոր մարզիչ Ստանիսլավ Չերչեսովն անդրադարձել է Մոսկվայի «Դինամոյի» 17-ամյա կիսապաշտպան Արսեն Զախարյանին: Ավելի վաղ հայ ֆուտբոլիստն ընդգրկվել է Եվրո-2020-ին պատրաստվող Ռուսաստանի հավաքականի ընդլայնված կազմում:

«Մենք չենք նայում տարիքին: Նայում ենք նրան, թե ինչպես է ֆուտբոլիստը խաղում ու զարգանում: Զախարյանը կարող է հանդես գալ մի քանի դիրքերում, նա իրեն դրսևորեց երիտասարդական Եվրոյում: Գումարած դրան՝ մենք կարող ենք ավելի լավ ծանոթանալ խաղացողներին, որպեսզի կայացնենք որոշում»- Չերչեսովի խոսքը մեջբերում է sport24-ը:

Ռուսաստանի հավաքականի մարզիչը հայտնել է նաև, որ Եվրո-2020-ի վերջնական հայտացուցակն ամենաուշը կհրապարակվի մինչև հունիսի 1-ը:

Հիշեցնենք, որ Ռուսաստանի ընթացիկ առաջնությունում Արսեն Զախարյանը «Դինամոյի» կազմում մասնակցել է 12 հանդիպման, դարձել 2 գոլի ու 4 գոլային փոխանցման հեղինակ:

Այս տարվա մարտին Զախարյանը Ռուսաստանի մինչեւ 21 տարեկանների հավաքականի կազմում մասնակցում էր Եվրո-2021-ի եզրափակիչ մրցաշարին: Նա Ռուսաստանի երիտասարդական հավաքականի կազմում գոլի հեղինակ դարձած ամենաերիտասարդ ֆուտբոլիստն է: Իսլանդիայի Մ-21 հավաքականի դեմ խաղում հայ ֆուտբոլիստը ռեկորդը սահմանել էր 17 տարեկան, 27 օրականում: Մինչև այս Ռուսաստանի երիտասարդական հավաքականի կազմում գոլի ամենաերիտասարդ հեղինակն էր Ֆյոդոր Սմոլովը, որն աչքի էր ընկել 18 տարեկան 17 օրականում: