Վենգեր. Ֆինանսական գործոնը ֆուտբոլը դարձրել է կանխատեսելի

Լոնդոնի «Արսենալի» նախկին գլխավոր մարզիչ Արսեն Վենգերը խոսել է ժամանակակից ֆուտբոլի հիմնական խնդրի մասին։

«Ֆուտբոլում ֆինանսների կարեւորությունը մեծացել է։ Ֆուտբոլն անկանխատեսելի խաղ է, բայց ֆինանսական գործոնի պատճառով այն դարձել է կանխատեսելի, քանի որ լավագույն ֆուտբոլիստները հավաքվել են մի քանի թիմերում։

Օրինակ՝ Չեմպիոնների լիգայի կիսաեզրափակիչում են աշխարհի չորս ամենահարուստ ակումբները՝ ՊՍԺ, «Մանչեսթեր Սիթի», «Ռեալ Մադրիդ», «Չելսի»։ Հաջորդ տարի կլինի նույն պատկերը, կամ կլինեն «Բարսելոնան», «Բավարիան», «Մանչեսթեր Յունայթեդը»։

Դա նշանակում է, որ 1982թ. եվրոպական Չեմպիոնների գավաթակիր «Աստոն Վիլայի» նման ակումբներն ընդմիշտ դուրս են մնացել այս մրցաշարից»,– Վենգերի խոսքը մեջբերում է BeIn Sports–ը։

Հիշեցնենք, որ 2004թ. Չեմպիոնների լիգայի գավաթակիր պորտուգալական «Պորտուն» 21–րդ դարում այս տիտղոսը նվաճած միակ ակումբն է, որը չի ներկայացնում 5 առաջատար լիգաները։