Մեկ շաբաթվա ընթացքում Իլոն Մասկն իր կարողությունը 12,8 միլիարդ դոլարով ավելացրել է

Իլոն Մասկը եւ Եվրոպայի ամենահարուստ մարդը՝ Բեռնար Առնոն, մեկ շաբաթվա ընթացքում իրենց կարողությունն ավելացրել են յուրաքանչյուրը 13 միլիարդ դոլարով եւ մոտեցել են աշխարհի ամենահարուստ գործարար Ջեֆ Բեզոսին, գրում է Forbes-ը:

Louis Vuitton-ի սեփականատեր Բեռնար Առնոյի կարողությունը մեկ շաբաթվա ընթացքում աճել է 13 միլիարդ դոլարով: Ֆրանսիացին շաբաթվա ընթացքում կապիտալի աճով առաջատար է դարձել համաշխարհային միլիարդատերերի շրջանում: Tesla-ի գործադիր տնօրեն Իլոն Մասկը նրան մի փոքր է զիջում՝ նրա կարողությունն ավելացել է 12,8 մլրդ դոլարով: Միլիարդատերերը շուկաների ռեկորդային աճի հիմնական շահառուներն են, որոնք չորրորդ շաբաթն անընդմեջ թարմացնում էին ռեկորդը:

Առնոյի LVMH ընկերության բաժնետոմսերը մեկ շաբաթվա ընթացքում աճել են 7,8%-ով եւ հասել են ռեկորդային բարձրության: Ներդրողները ընկերությունից սպասում են մեծ վաճառքներ եւ ողջունում են նոր ձեռքբերումներն ու համագործակցությունները: 15,8 միլիարդ դոլարով Tiffany & Co. ոսկերչական ապրանքանիշի գնումը դրական ազդեցություն է ունեցել: Առնոյի կարողությունը հասել է 181,6 միլիարդ դոլարի, վկայում է Forbes-ի վարկանիշը, որը թարմացվում է իրական ժամանակում: Գործարարի կապիտալը 2020 թվականի մարտից աճել է ավելի քան 100 միլիարդ դոլարով:

Ներկայումս Մասկի կարողությունը գնահատվում է 179,7 միլիարդ դոլար: Tesla-ի բաժնետոմսերը սակարկումների շաբաթն ավարտել են գրեթե 740 դոլարով՝ հինգ օրում դրանք թանկացել են 9,3%-ով: Ընկերության բաժնետոմսերը սկսել են արագ աճել այն բանից հետո, երբ Canaccord Genuity-ի վերլուծաբան Ջեդ Դորսհայմերը բաժնետոմսի գնի կանխատեսումը ավելի քան երկու անգամ ավելացրել է` մեկ բաժնետոմսի համար 419-ից հասցնելով 1071-ի: