Ֆուտբոլ առանց հանդիսականների եւ կորոնավիրուսի

Աշխարհի 2022 թվականի առաջնության որակավորման փուլի առաջին տուրում մարտի 24-ին, մի շարք հանդիպումներ են կայացել:

Աշխարհի գործող չեմպիոն Ֆրանսիայի հավաքականը Փարիզի «Ստադ դե Ֆրանս» մարզադաշտում ընդունել է Ուկրաինայի ազգային ընտրանուն ու ոչ-ոքի՝ 1-1 հաշվով ավարտել հանդիպումը:

Այս հանդիպումից հետո Ուկրաինան և Ֆրանսիան՝ մեկական միավոր վաստակելով, հանգրվանել են D խմբի մրցաշարային աղյուսակի երրորդ և չորրորդ հորիզոնականներում: Այս խմբում ընդգրկված մյուս թիմերի՝ Ֆինլանդիայի և Բոսնիա և Հերցեգովինայի հավաքականների միջև խաղում ևս ոչ-ոքի արդյունք գրանցվեց, բայց 2-2 հաշվով:

Կայացան նաև A խմբի հանդիպումները: Պորտուգալիայի ընտրանին Թուրինում մրցեց Ադրբեջանի հետ ու նվազագույն հաշվով հաղթանակ տարավ՝ Մաքսիմ Մեդվեդևի՝ 37-րդ րոպեին գրանցած ինքնագոլի շնորհիվ:

Խմբի մյուս խաղում Սերբիայի հավաքականը սեփական հարկի տակ ընդունեց Իռլանդիային և 3-2 հաշվով հաղթանակ տարավ:

ԱԱ-2022-ի ընտրական փուլի առաջին տուրում Սլովենիայի հավաքականը Լյուբլյանայում ընդունեց Խորվաթիային ու նվազագույն հաշվով հաղթանակ տարավ:

Միակ գնդակը խաղի 15-րդ րոպեին հեղինակեց Սանդրի Լովրիչը:

H խմբի մյուս խաղում Ռուսաստանի հավաքականը հյուրընկալվելիս մրցեց Մալթայի հետ ու 3-1 հաշվով հաղթանակ տարավ: 

Կիպրոսի հավաքականն ընդունեց Սլովակիային: Խաղն ավարտվեց 0-0 հաշվով:

Բելգիայի հավաքականը 3-1 հաշվով հաղթեց Ուելսին:

E խմբի մյուս խաղում Չեխիայի հավաքականը 6-2 հաշվով ջախջախեց Էստոնիային, որի կազմում բացակայում էին առաջատար մի շարք խաղացողներ, ինչպես նաև գլխավոր մարզիչը:

Այս հանդիպումներից հետո Չեխիայի և Բելգիայի ընտրանիները, 3-ական միավորով, զբաղեցնում են մրցաշարային աղյուսակի առաջին և երկրորդ հորիզոնականները համապատասխանաբար: Բելառուսը, Ուելսն ու Էստոնիան միավոր չունեն: